Bojd nokautirao Siti, Jovetić 15 minuta na terenu

Pogotkom Džordža Bojda pola sata prije kraja Barnli je osvojio velika tri boda u borbi za opstanak u Premijer ligi.

Mančester siti ponovo je podbacio. Ekipa sa “Etihada” igrala je loše, pa se nije ni mogla nadati boljem rezultatu.

Srčani domaćin, koji je nedavno uspio da ostane neporažen i na “Stamford bridžu” (1:1), pokazao je da umije sa glavnim kandidatima za titulu u Engleskoj.

Ono što nas treba da raduje je da se Manuel Pelegrini konačno sjetio, ali prekasno, tek u 74. minutu da je Stevan Jovetić i dalje igrač njegove ekipe.

Crnogorski as zaigrao je prvi put poslije više od mjesec i za kratko vrijeme na terenu uspio je da iz daljine uputi jedan solidan udarac, ali nije precizan.

Nakon novog neuspjeha “građani” su ostali pet bodova iza Čelsija, koji ima dvije utakmice manje. 

Prvu će odigrati sjutra protiv Sautemptona na svom terenu. Nije Sitiju sigurno ni drugo mjesto jer im je Arsenal poslije pobjede nad Vest Hemom prišao na samo bod zaostatka.