U Njemačkoj su u ponoć stupile na snagu promjene zakona o zaštiti od zaraze koje omogućuju automatsko uvođenje strožih mjera u borbi protiv covida-19, među kojima je i zabrana kretanja između 22 i 5 sati, i to u gradovima i opštinama sa sedmodnevnom incidencijom višom od 100 novozaraženih na 100 hiljada stanovnika.
Njemačka vlada je uoči stupanja na snagu promjena zakona apelovala na građane da se pridržavaju mjera, posebno onih koje se odnose na smanjenje kontakata u koje spada i zabrana kretanja u razdoblju između 22 i 5 sati.
„Znam da je teško, da to pada teško svakom od nas ali to je nužno za jedno prelazno razdoblje”, rekao je u petak ministar zdravlja Jens Špan.
Posebno je sporna mjera zabrane noćnog kretanja protiv koje su pred Ustavnim sudom u Karlsrueu podnijete mnogobrojne tužbe.
